سألنا البنات بيتجاوزا حزنهم إزاى بعيدًا عن قص الشعر؟.. بنعمل نيولوك وأكلة حلوة

الحياة ليست سعيدة دائما والأيام ليست وردية طوال الوقت، بل نمر ببعض الأوقات الصعبة والأزمات والمحن التي لا نستطيع تحملها، ونتعرض على إثرها للحزن والضيق، ولكن الفائز هنا هو من يتغلب على أحزانه ويتعلم الدرس جيدا، وكل منا يتغلب على أحزانه بطريقته الخاصة، لذا سألنا البنات، ماذا يفعلن لتجاوز أحزانهن؟

 

ريهام تتغلب على حزنها بالرقص والشوبينج:

قالت ريهام جمال الفتاة العشرينية “الحزن من أكتر الحاجات اللي بتدمر الإنسان علشان كده لازم يكون عندنا القدرة على التغلب عليه، وأنا شخصيا بطبعي مش بحب استسلم للحزن فبحاول اتغلب عليه بأكتر من طريقة سواء خروج أو شوبينج أو اتفرج على مسرحية كوميدية وأشغل أغاني وأرقص، بس بتغلب على الحزن” واستطردت “مش كل الرجالة اللي يتحزن عليها الراجل المحترم الحنين الجدع هو دا اللي يتحزن عليه حرفياً لكن في الغالب متزعليش على راجل أكتر من ساعة” موضحة أن هذه هي طريقتها في تجاوز الازمات وصنع بداية جديدة.

 

أمنية بتعمل “نيولوك” مبهر وتقى بتتعافى بالسفر:

 قالت أمنية ماهر “23 سنة” عن تجاوزها لأحزانها أنها تلجأ لعمل “نيولوك” مبهر لكل من يراه قائلة: “بروح أعمل “بيرسينج” بيغير مودي أوي، ولو حاجه كبيرة مثلا بسافر أي مكان أو بتجمع يوم مع قرايبي بحس إني بفصل من اللي مضايقني”.

بينما قالت تقى شديد صاحبة الـ 26 عام أن لها طريقة للانفصال عن الواقع بشياكة دون ايذاء نفسها أو غيرها، وأوضحت: “بتغلب علي أحزاني  بالسفر أو بخروجة مع صحاب،  بلمة عيلة ، بكوباية قهوة سخنة مع فيروز طبعا، أو أتفرج على مسلسل أو فيلم كوميدي ، وقبل أي حاجة ذكر ربنا والدعاء، وأصلي ركعتين تغذي روحي والقرآن”.

وأردفت: “كل دا أكيد بيفرق في النفسية وخصوصا لو حد بتشاركي حد و بتقسمي معاه حزنك ، ويسحب الطاقة السلبية اللي عندي، فبعد ممارسة طقوس العبادة بحس براحة و كأن روحي فعلا كانت جعانة وشبعت ، كوباية القهوة بتفرق جدا معايا في يومي عامة بتسحب مني طاقتي السلبية ، أكلة حلوة أعملها لنفسي لو مفيش حد أشاركه ويشيل عني”.

جانا بتكلم ربنا ونيرة بتروق البيت ونجلاء بتعيط

أما جانا عزام 23 سنة فردت مازحة: “مش عارفة اتغلب عليها والله كل الأحزان على مقاسي” ثم استطردت بجدية “لما أحس إني تايهة أو نفستي تعبانه بكلم ربنا، بحس براحه بعدها و قلبي بيطمن، خصوصاً لأن اذى لقلوب مش سهل وبيلم بعد فترة مش قليلة، كمان ممكن ممكن أكلم حد من صحابي، أو أعمل نسكافية و أشوف مسلسل”.

أما عن نيرة علام صاحبة الـ 22 عاما قالت: “لما بكون زعلانة وعاوزه أنسى زعلي بقوم أروق الشقة أو بأكل كتير أوي، كمان ممكن أتفرج على أي مسلسل عشان أشغل تفكيري، بينما نجلاء عوني قالت: “لما ببقى زعلانة بقضل أعيط لحد ما نفسيتي تتحسن، وأحيانا بروح عند ماما عشان أغير جو”.