“إيفا” عبرت عن خطورة إدمان السوشيال ميديا بالمكياج.. ما تخليهاش تسلسلك

تحولت مواقع التواصل الإجتماعى من وسيلة للتواصل مع الأصدقاء والأقارب إلى إدمان للكثير من الأشخاص، فالأب ينشغل أغلب الوقت بتصفح المواقع المختلفة من “فيس بوك وتويتر وإنستجرام” عن التحدث مع ابنه وزوجته الذين أيضاً منشغلين عنه بنفس الطريقة، فأصبحت الأسرة الواحدة لا تعلم عن أى شىء عن أفرادها، ما تسبب فى وجود مشاكل أسرية كثيرة، فشعرت فنانة المكياج إيفا عماد، بهذه المشكلة وعبرت عنها بالرسم على ذراعها ووجهها.

تحدثت إيفا عماد فنانة المكياج والحاصلة على بكالوريوس سياحة وفنادق، لـ” اليوم السابع”، عن “فوتوسيشن” إدمان السوشيال ميديا، حيث قالت “أنا بحب الرسم من طفولتى وبدأت أهتم بيه وأطور من أدائى، بالتعبير عن قضية أو مشكلة معينة بالرسم بالمكياج، ومنذ فترة قررت أعبر عن تأثير السوشيال ميديا فى حياتنا وعن قضايا تانية كمان، وعملت أكتر من حملة بالفعل وكانت آخرها حملة بعنوان “استخدم السوشيال ميديا مش هى اللى تستخدمك”، وكان هدفى منها أن الناس اللى بتتفرج على صور الحملة تشوف نفسها فيها وتعرف مدى تأثير السوشيال ميديا علينا وممكن توصلنا لحد فين، عشان الناس تقدر تتخلص من إدمانها لمواقع التواصل الاجتماعى”.

وتابعت “حاولت على قد ما أقدر أوضح المراحل اللى بنمر بيها خلال استخدامنا لمواقع التواصل الاجتماعى لوصلنا لمرحلة الإدمان، وللأسف أغلبنا بيستسلم للواقع ده وبيتجاهله”.

وعن الأدوات التى استخدامتها إيفا للتعبير عن إدمان السوشيال ميديا، قالت “استخدمت كل الخامات من أدوات الميك أب، و ألوان الوجه ومن الصعوبات اللى قابلتنى هى الرسومات محتاجة منى تركيز و دقة عشان أوصل للشكل اللى عايزاه”.

وعن رد فعل الناس على فكرة” الفوتوسيشن”، قالت “الناس عجبتها الفكرة جداً، وشجعونى لأنهم حسوا قد إيه بتعبر عن واقعهم وتفاعلوا معاها وفعلوا هاشتاج الحملة ودعمونى وفى ناس تانية فهمت الفكرة غلط، واعتقدت إنى بدعو لمقاطعة السوشيال ميديا وده مش صح، لكن أنا بقصد إننا نستفيد من إيجابيات السوشيال ميديا واللى حاسينا بيه خصوصاً بعد انتشار فيروس كورونا، وأصبحت مواقع التواصل الإجتماعى مصدر رزق لناس كتير، لكن نحذر من إدمان السوشيال ميديا”.

وأشارت إيفا فى نهاية حديثها عن أحلامها التى تود تحقيقها فى المستقبل، حيث قالت “نفسى فى المستقبل أعمل حملات مؤثرة باستخدام فن الميك أب وأعبر عن قضايا محلية وعالمية وأقدر من خلال فنى أوصل رسائل إيجابية للعالم كله، ويكون ليا بصمة مختلفة ومميزة فى عالم الميك أب بكل أنواعه”.