“أسيل” صممت بوكيهات حلاوة المولد والعروسة هدايا للمخطوبين.. بدل العلبة والورد

جرت العادة فى موسم المولد النبوى الشريف أن يقدم الخطيب لخطيبته هدية عبارة عن عروسة المولد مع علبة تحتوى على قطع مختلفة من حلوى المولد من سمسية وحمصية وغير ذلك من أنواعها المختلفة، لكن أسيل مصمة بوكيهات الورد والأكلات، فكرت فى إضافة طابع مختلفة لهدية المولد النبوى، حيث صممت بوكيه لحلوى المولد يمكن أن يهديها الخطيب لخطيبته.

 

تحدثت أسيل كمال، خريجة تجارة شعبة لغة إنجليزية، عن عملها ببيع الورد والأكلات، حيث قالت خلال حديثها لـ”اليوم السابع”: “اشتغلت حاجات كتير جدًا وأنا فى سنة أولى جامعة، لكن حبى للورد بدأ من وأنا فى إعدادى، كنت بحب أنظمه وأنسقه، وده شجعنى إنى أشتغل فى بيع الورد، وبالفعل فتحت محل خاص بيا، وبدأت أطور من البوكيات وأعمل منها بوكيه لأكلات مختلفة”.

وتابعت: “وبمناسبة مولد النبى ولأنه بيكون مع المدارس، والإقبال على بوكيهات الورد بيكون قليل أوى، فكرت أعمل حاجة مختلفة وجديدة بعيدة عن الهدايا التقليدية فى المولد زى بوكسات الحلاوة والعروسة، وعملت بوكيهات حلاوة المولد”.

وعن أشكال بوكيهات حلاوة المولد وأسعارها، قالت أسيل “شكل بوكيه حلاوة المولد بيحدده الزبون يعنى بيحدد عايز بوكيه بـ200 جنيه وأنا أشترى الحلاوة وأظبط البوكيه، أو الزبون يختار المحل بنفسه اللى عايز منه الحلاوة أو يسيبنى أعمل أنا البوكيه بنفسى وأشترى الحلاوة، وفيه عملاء بتحب البوكيه ألوانه هادئة وفيه بيحبوا ألوان مختلفة وهكذا حسب ذوق العميل”.

وأشارت أسيل خلال حديثها إلى أن زبائنها الذين يطلبون تصميم بوكيه حلاوة المولد، مختلفين منهم خطيب ليهدى خطيبته البوكيه أو أم لأطفالها وهكذا.

رغم أن الفكرة غير تقليدية إلا أنها كانت سهلة التنفيذ عن غيرها فقالت “مفيش صعوبات قابلتنى وأنا بصمم بوكيه حلاوة المولد، لأنها مش بتسيح زى الشيكولاتة وممكن تقعد لأيام لكن يمكن هى تقيلة شوية”.

وعن طلبات البوكيهات الغريبة التى طلبت من أسيل، قالت “أكتر بوكيه غريب أطلب منى كان عبارة عن ورد وعروسة وساعة وبالفعل نفذته لكن بخصوص مولد النبوى ماحدش طلب منى بوكيه غريب أو مختلف، لكن الجديد السنة دى اللى نفذته هو بوكيه بيحتوى على حلاوة المولد وعروسة”.

تحلم أسيل بأن يصبح مشروعها معروف على مستوى الجمهورية، حيث قالت :”نفسى يكون عندى محل وفريق كبير يصمم بوكيهات وبوكسات هدايا وأتعرف فى محافظات مصر كلها لكن قبل كده عايزة أثبت نفسى فى محافظتى الأول قبل ما أفتح فروع فى المحافظات التانية”.